భారత దేశంలో అత్యధిక థియేటర్లు కల్గిన రాష్ట్రంగా మరియు అత్యధిక సినిమాలు నిర్మించే రాష్ట్రంగా పేరొందిన మనకు తమిళనాడు తరహా లో స్వంత ఫిల్మ్ ఇనిస్టిట్యూట్ లేకపోవడం శొచనీయం.
భారత చలనచిత్ర పరిశ్రమకు మేలైన నటీనటులను మరియు సాంకేతిక నిపుణులను అందించే ఉద్ధేశ్యంతో 1960 లో ప్రభుత్వ సమాచార,ప్రసార మంత్రిత్వ శాఖ ఆధ్వర్యంలో పూణేలో Film and Television institute of India ను ఏర్పాటు చేయడం జరిగింది.
దీని ప్రభావంతో తమిళనాడులోనూ,పశ్చిమ బెంగాల్ లోనూ ఫిల్మ్ ఇనిస్టిట్యూట్లు ఏర్పాటు
చేయబడి,ఎంతో మంది నటీనటులు మరియు సాంకేతిక నిపుణులు వెలుగులోకి రావడం జరిగింది.
ముఖ్యంగామద్రాసు ఫిల్మ్ ఇని స్టిట్యూట్ నుండి శిక్షణ పొందినవారిలో హీరోలు చిరంజీవి,రాజేంద్రప్రసాద్ వంటి హేమాహేమీల నుండి నేటి మేటి దర్శకుడు"బొమ్మరిల్లు" భాస్కర్ వరకూ ఉండడం ఫిల్మ్ ఇనిస్టిట్యూట్ ల యొక్క ఆవశ్యకతను చెప్పకనే చెప్తుంది.
తెలుగు చలనచిత్ర పరిశ్రమ మద్రాసు నుండి హైదరాబాదుకు తరలి వచ్చి దశాబ్ధం పైబడి కావొస్తున్నా ఫిల్మ్ ఇని స్టిట్యూట్ ఏర్పటు దిశగా ఏ ప్రభుత్వమూ చొరవ చూపలేదు.
ఎన్నో అవరోధాల్ని ఎదుర్కొని,విజయ శిఖరాల్ని అధిరోహించిన నటీనటులు గానీ,సాంకేతిక నిపుణులు గానీ తమ వారసుల్ని ప్రమోట్ చేసుకొంటున్నారే తప్ప ఫిల్మ్ ఇనిస్టిట్యూట్ ఏర్పటు దిశగా ఎటువంటి ప్రయత్నం గానీ, ప్రభుత్వం పై ఒత్తిడీ గానీ తీసుకురావడం జరగలేదు.
ఐతే దేవదాస్ కనకాల గారి ఆధ్వర్యంలో నడుస్తున్న Film and Television Institute of Andhra Pradesh , మధుసూధనరావు గారి ఆధ్వర్యంలో నడుస్తున్న Madhu Film Institute లు "నటన" విభాగంలో కొంతవరకు ఆ లోటును తీర్చగలుగుతున్నాయి.
ఇక దర్శకత్వం నేర్పే ఇనిస్టిట్యూట్ లు అస్స లే లేవు.
ఎంతో కాలంగా ఎదురు చూసిన "Ramanaidu Film School" 25 మంది విద్యార్థులతో ("దర్శకత్వం" కోర్సు) ప్రారంభమైనా సంవత్సరానికి రెండు లక్షల రూపాయల ఫీజు అనేసరికి సామన్యుల ఆశల పై నీళ్లు చల్లినట్లయింది.
పోనీ స్వంతంగా ఏవైనా కోర్సులు నేర్చుకుందామనుకున్నా పుస్తకాలు దొరికే అవకాశం లేదు.ఒకవేళ దొరికినా కొన్ని వేల రూపాయలు వెచ్చించాల్సిన పరిస్థితి.
కొన్ని సంస్థలు (ఎలైట్ ఫిల్మ్ అకాడమి, రే ఫిల్మ్ ఇనిస్టిట్యూట్ లాంటివి) నటన,దర్శకత్వం మరియు స్క్రిప్టు రైటింగ్ లాంటి విభాగాలకు సంబంధించిన మెటీరియల్ ను అందిస్తున్నా,ప్రాక్టికల్ శిక్షణ కోసం స్వంతం గా ఏ టెలీఫిల్మో లేదా డాక్యుమెంటరీయో తీయడమో లేదా ఇంకొకరి దగ్గర అసొసియేట్ గానో చేయాల్సి వస్తుంది.ఐతే అనుభవం కోసం ఇంకొకరి దగ్గర సంవత్సరాల కొద్దీ అసిస్టెంట్ గా చేస్తే, "సృజనాత్మకత" దెబ్బ తినే ప్రమాదముంది.
"హ్యాపీడేస్" లాంటి చిత్రాల నేపథ్యంలో యువతరం చిత్రసీమను శాసిస్తూ వుండగా,ఇరవైఅయిదుకి పైగా ఛానళ్లతో రాజ్యమేలుతున్న తెలుగు టీ.వీ.రంగానికి కొన్ని వందలమంది సుశిక్షితులైన నటీనటుల మరియు సాంకేతిక నిపుణుల అవసరం ఏర్పడింది.
"మాస్ కమ్యూనికేషన్" (Mass Communication) విద్యార్థులతో టీ.వీ.రంగానికి మానవ వనరుల కొరత కొంతవరకు తీరుతున్నా, నిర్మాణాత్మక మైన,సుశిక్షితమైన శిక్షణ నిచ్చేఫిల్మ్ అండ్ టెలివిజన్ ఇనిస్టిట్యూట్ అవసరం తప్పకుండా వుంది.
